Gall Blwyddyn 11 fod yn gyfnod prysur wrth i chi geisio dewis beth i’w wneud nesaf, ymgeisio am gyrsiau neu hyfforddiant, dechrau adolygu ar gyfer eich arholiadau a delio â’ch bywyd cymdeithasol.

	Ydych chi eisiau cyngor am eich gyrfa, neu am gyrsiau a gwaith?
	Os ydych chi eisiau unrhyw wybodaeth neu gyngor am yrfaoedd, cyrsiau, gwaith neu hyfforddiant, yna gall Gyrfa Cymru eich helpu. Gallai siarad gyda Chynghorydd Gyrfa eich helpu chi benderfynu ar eich cam nesaf. Gallwn helpu hefyd ar ôl eich canlyniadau arholiad, pa un ai oeddent yn well neu’n waeth na’r disgwyl. Mae Gyrfa Cymru yn cynnig gwasanaeth cyfleoedd i bobl ifanc. Edrychwch ar gyfleoedd yn eich ardal leol. Rydym yn gweithio’n agos gyda’ch ysgol/coleg a chyflogwyr lleol i drefnu gweithgareddau fel sgyrsiau ar bynciau yn ymwneud â gyrfaoedd, diwrnodau menter, mentora a ffug-gyfweliadau. Gallwn helpu hefyd gyda dod o hyd i leoliadau profiad gwaith. Os ydych angen cefnogaeth ychwanegol cyn symud ymlaen i’ch cam nesaf, yna efallai mai Porth Ieuenctid yw’r ateb.

	Aros ymlaen mewn addysg ac angen cyngor am arian?
	Gall myfyrwyr sydd yn 16 a 17 oed ac sydd mewn addysg amser llawn neu'r coleg ac yn byw mewn ty lle mae incwm yn llai na £30,000 y flwyddyn, wneud cais am Lwfans Cynnal Addysg a asesir trwy brawf moddion. Gallwch dderbyn rhwng £10 i £30 yr wythnos. Caiff y cynllun ei ehangu yn 2005/6 a phobl sydd yn 18 oed yn 2006/7. Am fwy o wybodaeth am hawlio lwfansau ewch i wefan y llywodraeth. Bydd eich rhieni a'ch gofalwyr yn parhau i dderbyn Budd-dâl Plant.

	Dechrau hyfforddiant yn y gwaith ac eisiau cyngor am arian?
	Os ydych chi ar Brentisiaeth Sylfaenol neu Uwch byddwch yn derbyn lwfans hyfforddi neu gyflog o £50 yr wythnos o leiaf. Ar gyfer Adeiladu Sgiliau y lwfans yw o leiaf £45 yr wythnos. O fis Hydref 2004 ymlaen, bydd hawl gennych dderbyn lleiafswm cyflog o £3.00 yr awr os ydych yn 16 neu'n 17 oed ac yn gweithio, nid hyfforddi. Mae’n werth cofio hefyd ei bod hi’n bosib gael cyfraniad tuag at gostau teithio gydag ambell i gwrs Hyfforddiant yn y Gwaith. Gofynnwch i’ch Cynghorydd Gyrfa cyn rhoi eich llaw yn eich poced - fe all un cwestiwn syml eich helpu i arbed arian.

	Dydy bywyd ddim bob amser yn syml! Ydych chi angen cyngor?
	Beth bynnag yw’r broblem, mae wastad yn werth siarad am y peth. Os nad ydych yn teimlo y gallwch siarad â’ch teulu a’ch ffrindiau, mae llawer o bobl ar gael a all eich helpu. Wrth rannu problemau cewch help i’w datrys, felly cysylltwch â nhw. Am fanylion pellach ynglyn â sefydliadau sy'n helpy pobl ifanc, ewch i safle Clic.